सांसदहरू हतोत्साही हुने गरी सभामुख अर्यालले गरे सयभन्दा बढी संशोधन प्रस्ताव अस्वीकृत
थर्ड पोल
सांसदहरू संशोधन प्रस्ताव दर्ता गर्नै हतोत्साही हुने गरी सभामुख डोलप्रसाद अर्यालले सय भन्दा बढी संशोधन प्रस्तावहरू अस्वीकृत गरिदिएका छन्।
सेतोपाटीले अध्ययन गरेका तीन वटा विधेयकमा मात्र सभामुख अर्यालले १०४ वटा संशोधन अस्वीकृत गरेको भेटिएको छ।
बालबालिका सम्बन्धी पहिलो संशोधन विधेयकमा सभामुख अर्यालले एकैपटक ४७ वटा संशोधन अस्वीकृत गरिदिएका छन्।
त्यस्तै, मानव बेचबिखन तथा ओसारपसार नियन्त्रण पहिलो विधेयकमा ३४ वटा र नेपाल कानुन आयोग ऐनको संशोधन विधेयकमा २३ वटा संशोधन अस्वीकृत गरेका हुन्।
प्रतिनिधि सभा नियमावलीले सभामुखलाई पाँच वटा अवस्थामा संशोधन प्रस्ताव अस्वीकृत गर्ने अधिकार दिएको छ।
पहिलो, संशोधन विधेयकको विषयसँग सम्बद्ध नभएमा।
दोस्रो, विधेयकको सिद्धान्त अनुकूल नभएमा।
तेस्रो, अस्पष्ट वा अर्थपूर्ण नभएमा।
चौथो, सभाद्वारा पूर्वस्वीकृत सिद्धान्त वा निर्णय अनुकूल नभएमा र पाँचौं, कुन दफाको कुन व्यवस्था वा शब्दावलीको सट्टामा संशोधन गर्न खोजिएको हो भन्ने स्पष्ट गरी सांसदले संशोधन प्रस्तावमा नखुलाएमा।
