भरतपुरको मेयर बन्न विजय सुवेदीले दिए प्रदेशसभा सदस्यबाट राजीनामा
Admin@Thirdpole 
भरतपुर महानगरको प्रमुखका लागि उम्मेदवारी दिन बागमती प्रदेशसभा सदस्य विजय सुवेदीले पदबाट राजीनामा दिएका छन्। बिहीबार सुवेदीले प्रदेशसभाका सभामुख सानुकुमार श्रेष्ठसमक्ष पदबाट राजीनामा दिएका हुन्।
वैशाख ३० गते हुन लागेको स्थानीय तहको निर्वाचनमा भरतपुर महानगरपालिकाको मेयरमा उठ्न लागेकोले प्रदेशसभा सदस्यबाट राजीनामा दिएको उनले बताएका छन्। चितवनको क्षेत्र नम्बर २ को ख बाट प्रदेशसभा सदस्यमा निर्वाचित सुवेदी ४ वर्ष तीन महिना एक दिन बागमती प्रदेशसभा सदस्यको रुपमा रहेका थिए।
सुवेदी एमालेबाट भरतपुर महानगरपालिकाको मेयरमा उठ्न लागेका हुन्। निर्वाचन आयोगले वैशाख ३० गते हुने स्थानीय निर्वाचनमा उम्मेदवार बन्न पदबाट राजीनामा दिनैपर्ने बाध्यकारी नियम लगाएको छ।
