पर्यटक भिसामा आएर धर्म परिवर्तन गराउने गतिविधि : २० दिनमा ३४ विदेशी पक्राउ

 नेपालमा पर्यटक भिसामा प्रवेश गरी विभिन्न प्रलोभन देखाएर धर्म परिवर्तन गराउने गतिविधिमा संलग्न भएको आरोपमा पछिल्लो २० दिनमा ३४ जना विदेशी नागरिक पक्राउ परेका छन् । पक्राउ परेकामध्ये अधिकांशलाई अध्यागमन विभागले नेपालबाट निष्कासित (डिपोर्ट) गरिसकेको छ ।

अध्यागमन विभागका अनुसार विदेशी नागरिकले पर्यटक भिसाको उद्देश्यविपरीत स्वास्थ्य शिविर, बालगृह तथा शैक्षिक संस्था सञ्चालनको आवरणमा धार्मिक गतिविधि गर्दै आएको पाइएको छ ।

अध्यागमन विभागका महानिर्देशक रामचन्द्र तिवारीले पछिल्लो समय विदेशी नागरिकका गतिविधिमाथि निगरानी बढाइएको र भिसाको उद्देश्यविपरीत काम गर्नेहरूलाई पक्राउ गरी निष्कासन गरिएको जानकारी दिएका छन् ।

पछिल्लो घटनाअन्तर्गत कात्तिक ११ गते पर्यटक भिसामा नेपाल आएका पाँच अमेरिकी, तीन ब्राजिलियन र दुई क्यानडेली गरी १० जना विदेशी नागरिक मोरङको कानेपोखरी गाउँपालिका–७, बरगाछीमा स्वास्थ्य शिविर सञ्चालन गर्ने क्रममा धार्मिक गतिविधिमा संलग्न भएको आरोपमा पक्राउ परेका थिए ।

‘मर्सी डेभलपमेन्ट’ नामक संस्थाले आयोजना गरेको स्वास्थ्य शिविरमा सहभागी उनीहरूले क्रिश्चियन धर्म प्रचार गरेको आरोप लागेको छ । उक्त शिविर कात्तिक ८ गतेदेखि चार दिनसम्म सञ्चालन गर्ने तयारी गरिएको थियो ।

यसअघि असोज २३ गते मोरङको सुन्दरहरैँचा नगरपालिका–७ स्थित नेपाल न्यु कोभेनेन्ट कलेजमा धार्मिक गतिविधिमा संलग्न भएको आरोपमा २४ जना दक्षिण कोरियाली नागरिक पक्राउ परेका थिए । अध्यागमन विभागले उनीहरूलाई जनही ५० हजार रुपैयाँ जरिवाना गरी तीन वर्षसम्म नेपाल प्रवेश गर्न नपाउने गरी निष्कासन गरेको थियो ।

त्यस्तै, २०८३ वैशाख ५ गते विराटनगरबाट धर्म प्रचारमा संलग्न भएको आरोपमा छ जना सिंगापुरेली नागरिक पक्राउ परेका थिए ।

नेपालमा पर्यटक भिसाको दुरुपयोग गरी धार्मिक गतिविधि सञ्चालन गरेको आरोपमा विदेशी नागरिक पक्राउ परेको यो पहिलो घटना भने होइन । यसअघि अमेरिकी नागरिक डेनियल एस कोर्नीलाई पनि बालगृह सञ्चालनको आवरणमा धर्म प्रचार गरेको आरोपमा अध्यागमन विभागले नियन्त्रणमा लिएको थियो ।