स्वास्थ्य अवस्था जटिल बनेपछि अनशनरत डा. गोविन्द केसी हेलिकप्टरबाट काठमाडौं ल्याइए
थर्ड पोल
0
इलाममा अनशनरत डा. गोविन्द केसीको स्वास्थ्य अवस्था जटिल बनेपछि थप उपचारका लागि सोमबार बिहान नेपाली सेनाको हेलिकप्टरमार्फत काठमाडौं ल्याइएको छ ।
उनलाई उपचारका लागि त्रिवि शिक्षण अस्पतालमा भर्ना गरिने उनका सहयोगी पवन थापाले जानकारी दिएका छन् ।
टाइप–२ मधुमेहका बिरामी रहेका केसीको रगतमा ग्लुकोजको मात्रा निकै घटेको र पिसाबमा एसिटोनको मात्रा बढेको स्वास्थ्य परीक्षणबाट देखिएको छ । स्वास्थ्य अवस्था निरन्तर बिग्रिँदै गएपछि चिकित्सकहरूले थप विशेष उपचार आवश्यक रहेको बताएका छन् ।
विभिन्न माग राख्दै डा. केसीले बिहीबार साँझदेखि इलामको नारायणस्थान मन्दिर परिसरमा अनशन सुरु गरेका थिए ।
